संवाददाता
रियाद | नेपाली दूतावास बहराइनले आफ्नो आधिकारिक सामाजिक संजाल मार्फत प्रेष विज्ञप्ति जारी गर्दै ३१ मेई सम्ममा कोरोना संक्रमणका कारण कुनै नेपालीको मृत्यु नभएको स्पष्ट पारेको छ ।
दूतावासले नेपालका विभिन्न संचारमाध्यमले गैरआवासीय नेपाली संघको हवाला दिँदै बहराइनमा अन्य कारणबाट मृत्यु भएको नेपालीको कोरोना संक्रमणबाट मृत्यु भएकोमा उनी लगायत तीनजाको कोरोनाका कारण मृत्यु भएको समाचार केही संचारमाध्यममा आएको भन्दै बहराइनमा कोरोना भाइरसका कारण कुनै पनि नेपालीको निधन नभएको स्पष्ट पारेको हो ।
दूतावासद्धारा आइतबार जारी प्रेष विज्ञप्तिमा भनिएको छ ‘कोरोना संक्रमणका कारण कोही नेपालीको बहराइनमा निधन नभएको विषयमा यसअघि समेत विज्ञप्तिबाट स्पष्ट गरिसकेकोमा राजदूतावास यस विषयमा प्रसारित पछिल्ला समाचारहरुको खण्डन गर्दछ।’
दूतावासले “कोरोना संक्रमणबाट उत्पन्न यस असहज अवस्थामा भ्रामक समाचारहरु संप्रेषण हुँदा सबैमा पर्न सक्ने मानसिक पीडा बोध गर्नुका साथै गरिमामय कुनै पनि संघ/संस्थाबाट यसप्रकारका अपुष्ट तथा जनसमुदायमा भ्रम प्रसार हुने सुचना अशोभनीय हुने भएकाले त्यसो नगरीदिनु समेत अनुरोध गर्दछ ” भनिएको छ।
दूतावासले उक्त विज्ञप्तिमा भनेको छ, ‘बह्राईनी निकायबाट जारी सूचनालाई नै चुनौती दिने गरी नेपाली कामदारहरुको हकहित प्रवर्द्धन हेतु संचालित संघसंस्था बाट गलत सूचना भविष्यमा नहोस् भन्नेतर्फ समेत राजदूतावास सबैमा हार्दिक अपिल गर्दछ ।’
