वसन्त अनुभव
कपिलवस्तु, २९ बैशाख
जिल्लामा कोरोना संक्रमितहरुको संख्या एकाएक बढ्न थालेपछि प्रदेश नं. ५ को कपिलवस्तु जिल्लालाई शिल गरिएको छ । कपिलवस्तु जिल्ला सुरक्षा समितिको आज बसेको बैठकले कोरोना संक्रमणको संबेदनसिलता ख्याल गरि उक्त निर्णय गरेको हो ।
उक्त बैठकको निर्णय आज बैशाख २९ गते साँझ ५ बजेदेखि आगामी जेठ ५ गते राती १२ बजेसम्म कायम रहने श्रोतले जनाएको छ ।
यस अघि कोरोना संक्रमितको संख्या बढेपछि प्रदेश नं.५ को बाँके जिल्लाले पनि यसै गरि शिल गर्ने काम गरेको थियो ।
आजमात्र कपिलवस्तु जिल्लाको यशोधरा गाउँपालिकामा ८ जना र बुद्धभुमी नगरपालिकामा २ जना गरि १० जना कोरोना संक्रमित भेटिएका थिए ।
नयाँ भेटिएका संक्रमितहरु सबै क्वारेन्टाइनमा बसेका ब्यक्तिहरु हुन । ती मध्ये ७ जना यशोधरा गाउँपालिकामा रहेको अनिरुद्र माध्यमिक विद्यालयको क्वारेन्टाइनमा र १ जना पशुपति शिक्षा मन्दिरको क्वारेन्टाइनमा बसेका ब्यक्ति हुन भने बाकी २ जना बुद्धभूमि नगरपालिकामा रहेको गौतमबुद्ध क्वारेन्टाइनमा बसेका ब्यक्ति भएको जानकारी प्राप्त भएको छ ।
यी थप १० जना सँगै कपिलवस्तु जिल्लामा कोरोना संक्रमितको संख्या १५ जना पुगेको छ ।यसअघि मायादेवी गाउँपालिकामा ४ जना र सुद्धोधन गाउँपालिकामा १ जना गरि ५ जना कोरोना संक्रमित भेटिएका थिए ।
