वसन्त अनुभव
घोराही, दाङ १३ बैशाख
दाङ जिल्लाको घोराहीमा पनि पिसिआर प्रविधिबाट कोरोना परिक्षण शुरु भएको छ । दाङ घोराहीमा अवस्थित राप्ती स्वास्थ्य विज्ञान प्रतिष्ठानले शनिबारदेखि उक्त प्रबिधिबाट कोरोना भएनभएको बारे ल्याब परिक्षण शुरुवात गरेको हो ।
यस अघि दाङमा आरडिटी प्रविधिबाट मात्र कोरोना परिक्षण गरिदै आएको थियो । बैशाख १ गतेदेखि पिसिआर प्रविधिबाट थ्रोट स्वाव परिक्षण गर्ने भनिएपनी मेशिन आउन ढिला भएको कारण पिसिआर प्रविधिबाट प्रयोगशाला जाँच हुन नसकेको राप्ती स्वास्थ्य प्रतिष्ठानकि उपकुलपति डा संगिता भण्डारीले जानकारी दिनुभयो ।
दाङ बाट हालसम्म पिसिआर प्रविधिबाट कोरोना भएनभएको जाँच गर्नका लागि थ्रोट स्वाव नमुना भैरहवा र काठमाडौ पठाउनु पर्ने बाध्यता रहिआएको थियो ।
प्रतिष्ठानमा एकैपटक ८० जनासम्मको पिसिआर प्रविधिबाट स्वाव नमूना जाँच गर्न सकिने र अहिले १० जनाको थ्रोट स्वाब परिक्षण भइरहेको जानकारी स्वास्थ्य कार्यालय दाङकी प्रमुख सुनिता पौडेलले बताउनुभयो । साथै उहाँले अब यसक्षेत्रका साथै आसपासका जिल्लाका विरामीहरुलाई राहत मिल्ने जानकारी दिनुभयो ।
प्रदेश नं.५ को नेपालगन्ज, दाङ र भैरहवामा पिसिआर परिक्षण प्रयोगशाला स्थापना गर्ने निर्णय बमोजिम नै दाङ जिल्लाको घोराहीको राप्ती स्वास्थ्य विज्ञान प्रतिष्ठानमा पिसिआर मेशिन जडान गरिएको हो । दाङबाट हालसम्म ७१ जना विरामीको स्वाव भैरहवा र काठमाडौ लगेर परिक्षण गरिसकिएको छ तर कसैको पनि पोजिटिभ देखिएको छैन ।