दम्माम/साउदी अरब
नेपालीहरुको प्रमुख श्रम गन्तव्य मध्येका एक साउदी अरेबियामा COVID-19 (कोरोना) भाइरस बाट संक्रमितको संख्यामा सोमवार सम्ममा थप चार जना सहित १५ पुगेको पुष्टि भएको छ। यस महामारीलाई नियन्त्रणको लागी ९ मार्च २०२० बाट लागु हुने गरी साउदी सरकारले विद्यालय तथा विश्व विद्यालयहरू अर्को सुचना जारी नभए सम्मको लागी बन्द गरिएको छ भने संक्रमित बिरामी भेटिएको साउदीको पूर्वी शहर दम्मामको कतिफ र सिहात क्षेत्रमा अत्यावश्यक आवगमन बाहेक अन्य आवागमनमा रोक लगाईएको छ।
साउदी सरकारले सोमबारबाट युएई, कुवेत, बहराइन, लेवनान, सिरिया, दक्षिण कोरिया, इटली, इराक लगायतका देशहरूमा हवाई आवागमन बन्द गरेको छ भने आफ्नो नागरिकलाई ओमन, फ्रान्स, जर्मनी, टर्की र स्पेनको भ्रमणमा रोक लगाईएको छ साथै लेवनान, ईजिप्ट, ईटाली र दक्षिण कोरिया बाट आएका आप्रवासीहरूलाई दुई हप्ता सम्मको लागी self-quarantine मा रहन भनेको छ। यसका साथ साथै साउदी सरकारले COVID-19 को प्रति रक्षाको लागी WHO लाई एक करोड डलर ($१० मिलियन) बराबरको सहयोग गरिने घोषणा गरेको छ। यसै सन्दर्भमा रियाद स्थित नेपाली दूतावासले साउदीमा रहेका नेपालीलाई उच्च सतर्कता अपनाउन अपिल गरेका छन् ।
नेपाली दूतावासले सोमबार आफ्ना फेसबूक पेजबाट एक सूचना जारी गरि झन्डै साउदीमा कार्यरत साँढे तीन लाख नेपालीहरुलाई सतर्कता अपनाउन अनुरोध गरेका छन् । दूतावासले तत्काल सभा, सम्मेलन, भेटघाट, विभिन्न कार्यक्रम नगर्न समेत नेपाली समुदायलाई अनुरोध गरेका छन् ।
हवाई आवागमन बन्द गरेपछि यूएई ट्रान्जिट हुँदै नेपाल पठाउनका लागि सोमबार विमानस्थल पुगेका तीनजना नेपाली महिलाहरुलाई पुनः दूतावासमै फिर्ता ल्याएको दुताबासका द्वितीय सचिव भरत खनालले जानकारी दिए ।
