नेकपाभित्र झगडा रहेछ सभामुख कांग्रेसलाई दिनुस् : देउवा

  • १ माघ २०७६, बुधबार २१:२१ मा प्रकाशित
  • प्रमुख प्रतिपक्ष नेपाली काङ्ग्रेस सभापति शेरबहादुर देउवाले सभामुखको उम्मेदवार चयनमा नेकपाभित्र झगडा गर्ने भए आफ्नो पार्टीलाई दिन आग्रह गरेका छन्। बुधबार विराटनगर विमानस्थलमा सञ्चारकर्मीसँग कुराकानी गर्दै सभापति देउवाले सभामुख चयनका विषयमा नेकपाभित्र आपसमा झगडा गर्ने भए सभामुख कांग्रेसलाई दिन आग्रह गरेका हुन्। उनले संसद सञ्चालनको वातावरण बनाउन नेकपालाई आग्रह गरेका छन्। 

    ‘नेकपाले सभामुखको विषयलाई लिएर संसद चल्न दिएको छैन्, उनीहरुले मिलाउन नसके हामिलाई दिए हुन्छ’ देउवाले भने ‘यसरी एउटा विषयलाई लिएर संसद बन्धक बनाउने काम नहोस्।’ नेकपाको विवादका कारण संसद सञ्चालन नहुँदा महत्वपुर्ण विषयको निर्णय ढिला हुने र देशलाई हेर्ने विश्वको दृष्टिकोणमा नकरात्मक प्रभाव पर्ने देउवाले बताए।

    अमेरिकी मिलेनियम च्यालेन्ज कर्पोरेसन (एमसीसी) सहायताका विषयमा बोल्दै देउवाले कांग्रेसले अनुमोदन गर्ने भनेर पास गरिसकेको बताउँदै संसदमा अनुमोदन गर्न आग्रह पनि गरे। ‘नेपालको विकासमा अमेरिकाले साथ दिन खोजेको छ, यो विषयलाई अनुमोदन गरेर जानुपर्छ,’ देउवाले भने ‘यस्तो विषयमा खुट्टा कमाएर हुन्छ र?’

    कांग्रेस महाधिवेशन तोकिएकै समयमा हुने उनले दाबी गरे। असन्तुष्ट नेता रामचन्द्र पौडेल र कृष्णप्रसाद सिटौला समूहसँग वार्ता भइसकेको भन्दै उनले भने ‘महाधिवेशन समयमा हुनेमा अब आशंका छैन्।’ कांग्रेस केन्द्रीय कार्यसमितिको पुस ११ गते बसेको बैठकले असन्तुष्ट पक्षका नेताहरु पौडेल र सिटौला समूहको उपस्थितिबिना ०७७ फागुन ७ गतेदेखि १० गते १४ औं महाधिवेशन गर्ने निर्णय बहुमतले गरेको थियो।साभार अन्नपूर्ण पोस्ट

    Leave a Reply