–वसन्त अनुभव-
दाङ, ४ पौष/ तुलसीपुर उपमहानगरपालिका वडा नं. १८ हेमन्तापुर, दाङमा भिरे मौरीले टोक्दा ५ जना घाइते भएका छन ।
घाइते हुनेमा तुलसीपुर उपमहानगरपालिका वडा नं. १८ हेमन्तापुर एकाघरका ४५ वर्षीय चलाराम बुढा मगर, १५ वर्षीय बिमला बुढा मगर, १० वर्षीय आशिष बुढा मगर, ७ वर्षीय अनिष बुढा मगर र हेमन्तापुरकै ३५ वर्षीय आकाश वलि रहेको बुझिएको छ ।
स्थानीयका अनुसार घाइतेमध्ये २ जना(आशिष र अनिष)को राप्ती प्रादेशिक अस्पताल, तुलसीपुरमा सामान्य उपचार गराई घर फर्किसकेका छन भने चलाराम बुढा मगर र बिमला बुढा मगरको प्रादेशिक आयुर्वेद चिकित्सालय बिजौरी दाङमा उपचार भइरहेको छ । चलाराम बुढाको अवस्था अलि गंभिर रहेको बुझिएको छ ।
विद्यालयबाट बालबालिका घर फर्कदै गर्दा हेमन्तापुर प्रहरी चौकीको उत्तर तर्फ बाटोमा एक्कासी भिरे मौरीले आक्रमण गरि टोकेको र बचाउन गएका चलाराम लगायतका ब्यक्तिलाई समेत टोकेको बुझिएको छ ।