-बसन्त अनुभब-
दाङ्ग
दाङ जिल्लाको बंगलाचुली गा.पा.वडा नं. ६ बचेनीमा बस दुर्घटना हुँदा एक महिलाको घटनास्थलमै मृत्यु भएको छ ।
घोराही देखि मुर्कुटी हुँदै प्युठानको लागि छुटेको ना ३ ख ६५४२ नं. को बस दिउँसो करिब ३ बजे तिर बिपरित दिशाबाट आएको बसलाई साइड दिने क्रममा अनियंत्रित भइ करिब ५० मिटर तल खस्दा उक्त दुर्घटना हुन पुगेको हो ।
मृत्यु हुनेमा माण्डवी गाउँपालिका वडा नं. २ खुक्लिचौर निबासी वर्ष १७ कि नेहा वलि भएको जानकारी प्राप्त भएको छ । उक्त दुर्घटनामा गंभिर घाइते भएका गाडीका सहचालक बङलाचुली गा.पा. ५ का हिक्मत पुनको राप्ती स्वास्थ्य विज्ञान प्रतिष्ठान, घोराहीमा उपचार गरे पश्चात् थप उपचारका लागि कोहलपुर मेडिकल कलेज, बाँकेमा रिफर गरिएको हो ।
अन्य २० जना घाइतेको राप्ती स्वास्थ्य विज्ञान प्रतिष्ठान, घोराहीमा उपचार भइरहेको छ । प्रत्यक्षदर्शीका अनुसार दुबै गाडी तिब्र गतिमा भएको, बाटो साघुरो भएको र घुमाउरो मोडमा हर्न नबजाएकोले दुर्घटना हुन पुगेको थियो ।