कपिलवस्तु, बैशाख १६ ।
कञ्चनपुरबाट सरुवा भई आइतबार मात्र कपिलवस्तु आएका सशस्त्र प्रहरी बलका एक डिएसपी विवादित जनप्रतिनिधिसँगको भेटपछि आलोचनामा सुरु भएको छ । प्रस्तावित सिमा सुरक्षा गुल्म चाकरचौडाका प्रहरी नयाब उपरीक्षक डिएसपी दिपेन्द्र विष्ट मंगलबार बिहान शुद्धोधन गाउँपालिकाका अध्यक्ष कमलेश शरण चौधरीसँग भेटघाट गर्न पुगेपछि स्थानीय तहदेखि सुरक्षा निकायभित्रसम्म प्रश्न उठ्न थालेका छ ।
कञ्चनपुरस्थित ३५ नम्बर गणबाट सरुवा भई आएका विष्टले पदभार सम्हालेको दुई दिन नबित्दै पालिका अध्यक्ष चौधरीलाई भेटेका थिए । भेटका क्रममा अध्यक्ष चौधरीले आफ्नै कार्यकक्षमा विष्टलाई खादा ओढाएर टीका लगाइदिएको तस्बिरसमेत सार्वजनिक भएपछि यसले थप चर्चा पाएको छ ।
तर, उक्त भेट सामान्य शिष्टाचार मात्रै नभई विवादित पृष्ठभूमिसँग जोडिएर हेर्न थालिएको छ । पालिका अध्यक्ष चौधरीमाथि सामूहिक बलात्कारको गम्भीर आरोप लागेका छ । सोही प्रकरणमा रुपन्देही जिल्ला अदालत ले चैत २२ गते ८ लाख रुपैयाँ धरौटीमा उनलाई रिहा गरेको थियो । कानुनी रूपमा मुद्दा अझै अन्तिम टुंगोमा नपुगेको अवस्थामा सुरक्षा निकायका उच्च अधिकृतले यस्तो व्यक्तिसँग औपचारिक भेट गर्नु उपयुक्त हो वा होइन भन्ने विषयमा बहस सुरु भएको छ ।
यसैबीच, सोही शुद्धोधन गाउँपालिकाका उपाध्यक्ष होमप्रकाश चौधरीमाथि पनि गम्भीर आरोप लागिरहेको छ । चैत २३ गते चाकरचौडा सशस्त्र गुल्म मातहतको विओपी हथिहवामा कार्यरत सशस्त्र प्रहरी हवल्दार भीमबहादुर चौधरीमाथि मुक्का प्रहार गरेको आरोपमा उनीविरुद्ध ज्यान मार्ने उद्योगसम्बन्धी मुद्दा विचाराधीन रहेको बताइएको छ । यस घटनाले पनि स्थानीय राजनीतिक नेतृत्व र सुरक्षा निकायबीचको सम्बन्धलाई थप संवेदनशील बनाएको देखिन्छ । एकातिर पालिका अध्यक्षमाथि गम्भीर आपराधिक आरोप लागेको र उनी धरौटीमा छुटेका छन् भने अर्कोतर्फ उपाध्यक्षमाथि आफ्नै सुरक्षाकर्मीमाथि आक्रमणको आरोप छ । यस्तो अवस्थामा सशस्त्र प्रहरीका जिम्मेवार अधिकृतले उनीहरूसँग निकटता देखिने गरी भेटघाट गर्नुले विभिन्न आशंका जन्माएको स्थानीयको भनाइ छ ।
सीमानाका क्षेत्र चाकरचौडामा पछिल्लो समय भारतसँग जोडिएको भन्सार गतिविधि र तस्करी नियन्त्रणलाई लिएर तनाव बढिरहेको छ । यस्तो संवेदनशील परिस्थितिमा सुरक्षा संयन्त्रले निष्पक्ष र सन्तुलित भूमिका निर्वाह गर्नुपर्ने अपेक्षा रहँदै आएको छ । तर, विवादित जनप्रतिनिधिसँगको यो भेटले सुरक्षा निकायको निष्पक्षतामाथि नै प्रश्न उठाएको भन्दै आलोचना भइरहेको छ ।
चाकरचौडाका एक सशस्त्र हवल्दारका अनुसार, “सीमा क्षेत्रमा पहिलेको तुलनामा अहिले तनाव बढिरहेको छ । यस्तो अवस्थामा विवादित व्यक्तिसँग भएको विशेष भेटघाटले नयाँ खालको सन्देश दिन सक्छ ।” उनले थपे, “चैत २३ गते भएको हवल्दार कुटपिट घटनाबारे जानकारी लिन कपिलवस्तुस्थित सशस्त्र प्रहरीका एसपी गोपाल अधिकारीलाई मुख्यालयले बोलाएको थियो ।”
