कपिलवस्तु ,माघ २९
कपिलवस्तुको मायादेवी गाउँपालिका वडा नम्बर २ मनखोरियामा मन्खोरिया युवा क्लबको आयोजनामा चौथो भलिबल प्रतियोगिता आजदेखि औपचारिक रूपमा सुरु भएको छ । प्रतियोगिता फाल्गुन २ गतेसम्म सञ्चालन हुने आयोजकले जनाएको छ ।
कार्यक्रमको उद्घाटन नेपाली कांग्रेस कपिलवस्तु क्षेत्र नम्बर–१ का प्रतिनिधि सभा सदस्य उम्मेदवार अतहर कमालले गर्नुभयो । उद्घाटन समारोहलाई सम्बोधन गर्दै कमालले खेलकुद युवाहरूको व्यक्तित्व विकास, अनुशासन, नेतृत्व क्षमता तथा सकारात्मक सोचको आधार भएको बताउनुभयो ।
उहाँले युवाशक्तिलाई सही दिशामा अगाडि बढाउन खेलकुद अत्यन्त प्रभावकारी माध्यम भएको उल्लेख गर्दै कुलत र नकारात्मक प्रवृत्तिबाट टाढा राख्न यस्ता प्रतियोगिताले महत्वपूर्ण भूमिका खेल्ने धारणा राख्नुभयो । “स्वस्थ युवा नै समृद्ध राष्ट्रका आधार हुन्,” उहाँले भन्नुभयो ।
कमालले ग्रामीण क्षेत्रमा खेलकुद पूर्वाधारको विकास र नियमित प्रतियोगिता आयोजना आवश्यक रहेको उल्लेख गर्दै आगामी दिनमा यस्ता सिर्जनात्मक गतिविधिलाई थप प्रोत्साहन गर्ने प्रतिबद्धता व्यक्त गर्नुभयो । खेलकुदले जात, धर्म र राजनीतिक भिन्नताभन्दा माथि उठेर समाजलाई एकताबद्ध बनाउने शक्तिशाली माध्यम भएको पनि उहाँको भनाइ थियो ।
उद्घाटन कार्यक्रममा विभिन्न राजनीतिक दलका प्रतिनिधि सभा सदस्यका उम्मेदवारहरू, पालिकाका जनप्रतिनिधि तथा नेता–कार्यकर्ताहरूको समेत उपस्थिति रहेको थियो । कार्यक्रममा मन्खोरिया युवा क्लबका पदाधिकारी, खेलाडी तथा खेलप्रेमीहरूको उल्लेखनीय सहभागिता रहेको थियो ।