कपिलवस्तु -१ मंसिर
मलखादको अभावपछि शुद्धोधन गाउँपालिकाका कृषकहरूले आइतबार गाउँपालिका कार्यालयमा तालाबन्दी गर्दै विरोध प्रदर्शन गरेका थिए । आक्रोशित कृषकहरूले प्रमुख, उपप्रमुख, कृषि शाखासहित कार्यालयका विभिन्न कक्षमा तालाबन्दी गर्दै नाराबाजीसमेत गरेका थिए ।
तालाबन्दी गर्नु अघि कृषकहरूको समूह गाउँपालिका अध्यक्षको कार्यकक्षमा पुगेको थियो । उनीहरूले अध्यक्ष कमलेश शरण चौधरीलाई ज्ञापनपत्र बुझाउँदै खेतीको मुख्य सिजनमा अत्यावश्यक मल समयमै नपाउँदा किसानहरू मारमा परेको गुनासो राखे । कृषकहरूले बारम्बार मलको सूचना माग गर्दा पनि पालिकाबाट स्पष्ट जवाफ नआएको र वितरण प्रक्रिया अव्यवस्थित भएको गुनासो गरे ।
ज्ञापनपत्रमा कृषकहरूले उल्लेख गर्दै क्षमतावान कृषि सहकारी संस्थाका लागि पालिकाले मलको कोटा निर्धारण नगरेको र पालिका उपाध्यक्ष होमप्रकाश चौधरीले व्यक्तिगत रिसिईबिइका कारण सो कोटामा कटौती गरेको आरोप लगाइएको छ । उनीहरूको दाबीमा, कोटा कटौतीका कारण वडा नम्बर ५ का किसानहरू मल अभावको गम्भीर समस्यामा परेका छन् ।
उपाध्यक्ष चौधरीका अनुसार कुनै व्यक्तिगत निर्णय नगरेको स्पष्ट पार्दै, समस्या सहकारीकै कर्तुतका कारण उत्पन्न भएको बताए । उनका अनुसार, केही दिनअघि क्षमतावान कृषि सहकारी संस्थाले ल्याउँदै गरेको मल बीच बाटोमै बिक्री गरेको पाइएपछि स्थानीयवासीले उपाध्यक्ष चौधरी र वडा अध्यक्ष अशुतोष कुमार सिंहको रोहवरमा मल नियन्त्रणमा लिएर प्रहरीलाई बुझाएका थिए ।
उपाध्यक्ष चौधरीले भने, “यो घटना सम्बन्धी मुद्दा अहिले कानुनी प्रक्रियामा छ । मुद्दा नटुंगिँदासम्म क्षमतावानसहित दुई संस्थाको कोटा रोकिएको हो । ती संस्थालाई दिनुपर्ने मल अन्य सञ्चालनमा रहेका सहकारीमार्फत किसानलाई वितरण गरिएको छ ।”
उपाध्यक्ष चौधरीले किसानहरूको आन्दोलन र आरोपलाई राजनीतिक उद्देश्यसहित गरिएको दाबी पनि गरे ।
गाउँपालिका अध्यक्ष कमलेश शरण चौधरीले ज्ञापनपत्र प्राप्त भएको पुष्टि गर्दै आवश्यक छानबिन गरी समस्या समाधानका लागि पहल गर्ने प्रतिबद्धता जनाएका छन् ।