कपिलवस्तु – २८
शुद्धोधन गाउँपालिका–१ बगदीमा आज विद्यार्थी गुणीय चक्र (एसक्युसि)–शैक्षिक महाकुम्भको तयारीसहित भव्य प्रभातफेरी तथा कलश यात्रा सम्पन्न गरिएको छ । क्वेष्ट नेपालको समन्वयमा सन लाइट इङ्लिस बोर्डिङ स्कुलले आयोजना गरेको कार्यक्रममा विभिन्न विद्यालयका विद्यार्थी, शिक्षक र अभिभावकको उत्साहपूर्ण सहभागिता रहेको थियो ।
प्रभातफेरी विद्यालय परिसरबाट शुरु भई बगदी बजारका विभिन्न टोल परिक्रमा गर्दै पुनः विद्यालयमै समापन गरिएको थियो । विद्यार्थीहरूले शिक्षा, अनुशासन, सिर्जनशीलता, टोलीगत समन्वय र सकारात्मक सोच प्रवर्द्धन गर्ने सन्देशयुक्त ब्यानर, पम्प्लेट र प्लेकार्डसहित सहभागिता जनाएका थिए । मार्गभरि विद्यार्थी तथा शिक्षकहरूको सक्रिय उपस्थितिले वातावरण शिक्षामय बनेको थियो ।
मंसिर ५ र ६ गते आयोजना हुन गइरहेको ‘एसक्युसि–शैक्षिक महाकुम्भ’ मा कपिलवस्तु जिल्लाका १७ विद्यालयका करिब ७०० विद्यार्थी सहभागी हुने प्रबन्ध निर्देशक एस.एन. त्रिपाठीले जानकारी दिए । उनका अनुसार हाल जिल्लाभर विद्यार्थी गुणस्तर सुधार, व्यवहारिक सीप अभिवृद्धि र सिर्जनशीलता विकाससँग सम्बन्धित विभिन्न शैक्षिक गतिविधि निरन्तर सञ्चालन हुँदै आएका छन् । त्यसलाई थप प्रभावकारी बनाउन तथा महाकुम्भबारे जनचेतना अभिवृद्धि गर्न आजको प्रभातफेरी आयोजना गरिएको हो ।
त्रिपाठीका अनुसार एसक्युसि कार्यक्रमले विद्यार्थीको नेतृत्व क्षमता, समस्या समाधान कौशल, टोलीगत समन्वय, व्यवहारिक सीप र सामाजिक चेतनामा उल्लेखनीय सुधार ल्याइरहेको छ । यही कारण जिल्लाका विभिन्न विद्यालयलाई समेटेर अभिमुखीकरण, अन्तरक्रिया कक्षा र जनचेतनामूलक अभियान निरन्तर सञ्चालन भइरहेको उनले बताए ।
उनले विद्यार्थीहरूको उत्साह, अनुशासन र सक्रियता सराहनीय रहेको उल्लेख गर्दै, “आगामी शैक्षिक महाकुम्भलाई सफल बनाउन विद्यालय परिवार पूर्ण रूपमा तैयार छ,” भने ।
त्यस्तै, सहभागी विद्यालयहरूले विद्यार्थी–केन्द्रित यस्ता शैक्षिक अभियानले बालबालिकामा आत्मविश्वास, नेतृत्व क्षमताको विकास र सकारात्मक सोच अभिवृद्धिमा ठूलो योगदान दिएको प्रतिक्रिया दिएका छन् ।