नेपाली राष्ट्रिय फुटबल टिमका मुख्य प्रशिक्षक अब्दुल्ला अल्मुताइरीले साफ च्याम्पियनसिप-२०२१ मा माल्दिभ्समाथि शुक्रबार राति प्राप्त जितका लागि पूर्णत: हकदार रहेको बताएका छन् । उनले अहिले नै खुसीयाली मनाउन हतार नगर्न पनि अनुरोध गरेका छन् । उनले माल्दिभ्समाथिको जित आफैमा ऐतिहासिक भएको भने मानेका छन् ।
प्रशिक्षक अल्मुताइरीले भनेका छन्, ‘माल्दिभ्सलाई उसकै भूमिमा हराउनु आफैमा ठूलो हो, यसको फरक महत्त्व छ। त्यसमाथि साफ च्याम्पियनसिपमै यो माल्दिभ्समाथि नेपालको पहिलो जित हो। त्यसैले म आफै निकै भावनात्मक भएको छु र उत्तिकै खुसी पनि छु। तर अहिले नै धेरै खुसीयाली मनाउन हतार पनि नगरौं।’
उनले थपे, ‘म सबै नेपाली फुटबल समर्थक र अखिल नेपाल फुटबल संघ सबैलाई भन्न चाहन्छु, हामीले अझै धेरै गर्न बाँकी छ। हामी सबै काम योजनाबद्ध ढंगले तह तहमा गर्नेछौं। अब हाम्रो खेल श्रीलंकाविरुद्ध छ। हामीले अहिले नै सबथोक प्राप्त गरेका छैनौं। हामी सबै संयमित हुनु पर्छ।’ अल्मुताइरीका लागि व्यक्तिगत रूपमा पनि यो जित विशेष रह्यो।
मालेस्थित नेसनल स्टेडियममा नेपाली टिमको हौसला बढाउन आएका नेपाली दर्शक।
खेलको अघिल्लो दिन मात्र उनका काकाका कुवेतमा निधन भएको थियो र यसै कारण उनी प्रतियोगिताको प्रि म्याच कन्फ्रेन्समा उपस्थित समेत हुन पाएनन्। उनलाई ढाडको पनि समस्या भइरहेको छ र यसका लागि शल्यक्रिया नै आवश्यकता रहेको छ। यस्तोमा उनले भने, ‘प्रशिक्षकको काम कहाँ सजिलो छ र? फुटबलमा प्रशिक्षकको व्यक्तिगत भावनाको कुनै अर्थ छैन।’
प्रशिक्षक अल्मुताइरीको भनाइ थियो, ‘मेरो परिवारको एक सदस्यको निधन भएको छ र तर अहिले म यहाँ व्यस्त छु। मेरा लागि के ठूलो हो, त्यसको अर्थ छैन। मैले टिमको भलाइका लागि काम गर्नु पर्छ। म आफै ढाडको समस्याबाट गुज्रिरहेको छु। हामी सबैका लागि यति बेला टिमको प्रदर्शनको मात्र अर्थ छ।’
तस्बिरहरू : एन्फा