तुलसिपुर १८ भाद्र
दाङमा क्रियाशिल विभिन्न टेक्निकल ईन्स्टिच्युटले संयुक्त रुपमा ज्ञापन पत्र बुझाएका छन् । सरकारले देशभरका प्राविधिक शिक्षालयहरुको स्वास्थ्य शिक्षा कार्यक्रम खारेज गरेको प्रति विरोध जनाउदै जिल्लाका सात वटा ईन्स्टिच्युटले प्रमुख जिल्ला अधिकारी गोविन्द प्रसाद रिजाल मार्फत प्रधानमन्त्रीलाई ज्ञापन पत्र बुझाएका छन् ।राष्ट्रिय चिकित्सा शिक्षा आयोगको गएको साउन ३० गते बसेको बैठकले डिप्लोमा तह भन्दा मुनिका स्वास्थ्य शिक्षा कार्यक्रम यसै शैक्षिक सत्र देखी नगर्न र नगराउन निर्णय गरेको प्रति उनीहरुले आपत्ती जनाएका छन् ।
शैक्षिक सत्र ०७७÷०७८ को नवीकरणका लागी सिटीईभिटिले आबश्यक दस्तुर समेत जम्मा गराई सकेको अवस्थामा नवीकरण नगर्दा सरकारले खारेजी गर्न खोजेको उनीहरुले आरोप लगाएका छन् । कोरोना माहामारीका कारण शैक्षिक क्षेत्र ठप्प भएको बेला सिटिईभिटिबाट सम्वन्धन प्राप्त प्राविधिक शिक्षालयलाई राहत दिनुको साटो उल्टो मर्कामा पार्ने काम गरेको उनीहरुको आरोप छ । आफुहरुले ज्ञापन पत्र बुझाईदै डिप्लोमा तह मुनिका स्वास्थ्य शिक्षा कार्यक्रमहरु(सि.एम.ए,अनमी, ल्याव असिस्टेन्ट र आयुर्वेद सहायक जस्ता कार्यक्रम सन्चालनका लागी नवीकरण तथा भर्ना प्रक्रियालाई अगाडी बढाई दिनुको साथै स्तरोन्नतीको लागी माग समेत गरेको दाङ टेक्निकल ईन्स्टिच्युट तुलसीपुरका सन्चालक दोर्ण वलीले जानकारी दिएका छन् ।
उनका अनुसार दाङ पोलिटेक्निक ईन्स्टिच्युट तुलसीपुरका विजय बहादुर थापा,तुलसीपुर प्राविधिक शिक्षालय तुलसीपुरका कौसिला खड्का र बगरबावा प्राविधिक शिक्षालय लमहीका राम बहादुर चौधरी लगाएतको उपस्थितिमा ज्ञापन पत्र बुझाईएको हो ।