तौलिहवा, कपिलवस्तु – ०१
जिल्ला प्रहरी कार्यालय कपिलवस्तुले स्रोत नखुलेको ठूलो परिमाणको भारतीय रुपैयाँसहित एक हुण्डी कारोबारीलाई नियन्त्रणमा लिएको छ । विशेष सूचनाका आधारमा खटिएको प्रहरी टोलीले तौलिहवा क्षेत्रबाट मायादेवी गाउँपालिका वडा नं. ८, बरकुलपुर बस्ने २२ वर्षीय अभिषेक गुप्तालाई १४ लाख भारतीय रुपैयाँसहित पक्राउ गरेको हो ।
प्रहरीले गुप्ता सवार लु १८ प ८७४७ नम्बरको पल्सर मोटरसाइकललाई चेकजाँच गर्ने क्रममा लुकाई राखेको अवस्थामा उक्त रकम फेला पारेको थियो । जिल्ला प्रहरी कार्यालयका डीएसपी रिपेन्द्र कुमार सिंहका अनुसार पक्राउ परेका अभिषेकका बुबा सुरेश कुमार गुप्ता पहिलेदेखि नै प्रहरीको कडा निगरानीमा थिए। सुरेश बर्रोहियामा रहेको न्यू गुप्ता आयल सेन्टरका सञ्चालक हुन् ।
चाकरचौडा नाकाबाट दैनिक २ करोड भारुको हुण्डी कारोबार हुने आशंका :
पछिल्लो समय हुण्डी कारोबार चाकरचौडा क्षेत्रबाट व्यापक रुपमा हुँदै आएको छ । एक जना स्थानीय ब्यापारीका अनुसार चाकरचौडा नाकाबाट मात्रै अहिलेको समयमा दैनिक करिब २ करोड भारतीय रुपैयाँ हुण्डी मार्फत नेपाल भित्रिने गरेको छ । सीमावर्ती क्षेत्रमा रहेका केही पहुँचवाला ब्यापारीहरूको ‘सेटिङ’मा यो अवैध धन्दा निर्वाध चलिरहेको स्थानीयको दाबी छ ।
पम्पको आड र दोहोरो नागरिकता :
हुण्डी कारोबारमा सक्रिय गुप्ताले पेट्रोल पम्पको आडमा अवैध रकम कारोबार गर्दै आएका थिए । भारतको सिद्धार्थनगर जिल्ला, अलिगढवा थानाअन्तर्गत बरकुल निवासी गुप्ता परिवारका सदस्यहरुसँग दोहोरो नागरिकता भएको स्थानीयको आरोप छ । यसअघि पनि गुप्ताका भरिया निरज श्रीवास्तव १६ लाख र भाइ विष्णु गुप्ता १० लाख अवैध रकमसहित पक्राउ परिसकेका छन् ।
प्रहरीले यस घटनासँग अन्य ठूला कारोबारीहरू समेत जोडिएको हुनसक्ने आशंका गर्दै अनुसन्धानलाई तीव्र बनाएको छ । पक्राउ परेका गुप्तालाई थप कारबाहीका लागि राजश्व अनुसन्धान कार्यालय बुटवल पठाइएको प्रहरीले जनाएको छ ।
