कपिलवस्तु, बैशाख १७
प्रस्तावित सिमा सुरक्षा गुल्म चाकरचौडा अन्तर्गत मुख्य गेटमा ड्युटीमा रहेका सुरक्षाकर्मीमाथि तस्करसँग मिलेमतो गरी अवैध गतिविधि सञ्चालन गरेको गम्भीर आरोप लागेको छ । पीडित किसानका अनुसार आइतबार करिब ११–१२ बजेको समयमा आफ्नो घरायसी प्रयोजनका लागि ल्याउँदै गरेको ३० केजी धानको बिउ गुल्मका एक जना सईले मुख्य गेटमै नियन्त्रणमा लिएका थिए । तर पछि उक्त धान गायब भएको भन्दै किसानहरूले शंका व्यक्त गरेका छन् ।
सामान्यतया नियन्त्रणमा लिइएका समानहरू क्याम्प वा भन्सार कार्यालयमा बुझाउने प्रचलन भए पनि यस घटनामा त्यसो नभई धान नै हराएको आरोप लागेको छ । सो विषयमा गुल्ममा किसानले सोधपुछ गर्दा “चाकरचौडा गुल्मका डीएसपी दिपेन्द्र बिष्टले यहाँ कुनै पनि धान नियन्त्रणमा लिइएको छैन” भन्ने जवाफ दिएको किसानको भनाइ छ ।
यसैबीच, सिमा क्षेत्रमा ड्युटीमा रहेका सुरक्षाकर्मीलाई तस्करहरूले चिकेन बिरियानी खुवाई प्रभावमा पारी बोर्डरको पूर्वतर्फ रहेको खेतको वैकल्पिक बाटो प्रयोग गरी धानको बिउ गोदामसम्म पुर्याउँदै आएको आरोपसमेत स्थानीयले लगाएका छन् । त्यस्तै, सोही दिन घरायसी प्रयोजनका लागि ल्याइएको करिब १० केजी चिनी पनि मुख्य गेटमै नियन्त्रणमा लिइएको भए पनि क्याम्प वा भन्सारसम्म नपुर्याई सुरक्षाकर्मीले आफ्नै प्रयोगका लागि पठाएको आरोपसमेत लागेको छ ।
कृषि सिजन नजिकिँदै गर्दा बिउ छर्ने समय भए पनि किसानहरूले बिउ अभाव झेल्नुपरेको र भारतीय पक्षबाट सहजता भए पनि नेपालकै सुरक्षाकर्मीबाट अवरोध र दुःख पाउनु परेको स्थानीय सहजाद खानले बताएका छन् ।
