कपिलवस्तु, माघ १८
राष्ट्रिय मुक्ति पार्टी नेपाल, जनता समाजवादी पार्टी र नागरिक उन्मुक्ति पार्टी नेपालको संयुक्त समर्थनमा कपिलवस्तु प्रतिनिधिसभा सदस्य निर्वाचन क्षेत्र नम्बर २ बाट जामवन्ती भुज साझा महिला उम्मेदवारका रूपमा चुनावी मैदानमा उत्रिएकी छन् ।
आगामी फागुन २१ गते हुने प्रतिनिधिसभा सदस्य निर्वाचनमा विजयी भई क्षेत्रको विकास र महिला सशक्तीकरणमा सक्रिय भूमिका निर्वाह गर्ने लक्ष्यसहित उनी चुनावी अभियानमा जुटेकी छन् ।
तीन दलको साझा उम्मेदवारका रूपमा भुजले जाँतो (चकिया) चुनाव चिह्न लिएर निर्वाचनमा प्रतिस्पर्धा गरिरहेकी छन् । घरदैलो तथा प्रचार–प्रसार अभियानका क्रममा महिला उम्मेदवार भएकै कारण स्थानीय तहमा उल्लेख्य समर्थन र सहयोग प्राप्त भइरहेको जनाइएको छ ।
महिला प्रतिनिधित्व सशक्त बनाउने उद्देश्यसहित अघि सारिएको साझा उम्मेदवारीप्रति महिला, दलित तथा पिछडिएका समुदायबाट उत्साहजनक समर्थन देखिएको नेताकार्यकर्ताहरूले बताएका छन् । स्थानीय बासिन्दाहरूले यसपटक परिवर्तनका लागि महिला उम्मेदवारलाई अवसर दिनुपर्ने बताएका छन् ।