कपिलवस्तु , फागुन ३
राष्ट्रिय मुक्ति क्रान्ति नेपालले कपिलवस्तु निर्वाचन क्षेत्र नम्बर–२ मा जामवन्ती भुजलाई प्रतिनिधि सभा सदस्यका लागि उम्मेदवार घोषणा गरेको छ । उम्मेदवार भुजले आफ्नो चुनावी एजेन्डा सार्वजनिक गर्दै युवा, स्वास्थ्य, पर्यटन र नगरको पहिचानसँग जोडिएका महत्वाकांक्षी योजनाहरू अघि सारेकी छन् ।
युवालाई स्वारोजगारमा जोड्ने योजना
भुजले क्षेत्रका युवालाई लक्षित गर्दै सीपमूलक तालिम, सहुलियतपूर्ण ऋण र साना उद्यम प्रवर्द्धनमार्फत स्वारोजगार सिर्जना गर्ने योजना प्रस्तुत गरेकी छन् । “वैदेशिक रोजगारीमा निर्भरता घटाउँदै स्थानीय स्तरमै अवसर सिर्जना गर्नु प्राथमिकता हुनेछ,” उनले बताइन् ।
तौलिहवा अस्पताल व्यवस्थापन
तौलिहवास्थित जिल्ला सरकारी अस्पतालको सेवा–सुविधा विस्तार, आवश्यक जनशक्ति व्यवस्थापन र पूर्वाधार सुधार गरी प्रभावकारी स्वास्थ्य सेवा उपलब्ध गराउने प्रतिबद्धता व्यक्त गरिएको छ ।
तिलौराकोटमा बुद्धको विशाल मूर्ति
ऐतिहासिक तथा पुरातात्त्विक महत्व बोकेको तिलौराकोट क्षेत्रमा भगवान बुद्धको ठूलो मूर्ति स्थापना गरी धार्मिक पर्यटन प्रवर्द्धन गर्ने योजना पनि सार्वजनिक गरिएको छ । यसले आन्तरिक तथा बाह्य पर्यटक आकर्षित गरी स्थानीय अर्थतन्त्र चलायमान बनाउने अपेक्षा गरिएको छ ।
कपिलवस्तु नगरपालिकालाई विश्वसामु चिनाउने लक्ष्य
देशको दोस्रो नगरपालिका मानिने कपिलवस्तु नगरपालिकालाई ऐतिहासिक, धार्मिक र सांस्कृतिक धरोहरको आधारमा अन्तर्राष्ट्रिय स्तरमा परिचित गराउने लक्ष्यसमेत एजेन्डामा समेटिएको छ ।
उम्मेदवार भुजका अनुसार यी योजनाहरू कार्यान्वयनका लागि संघीय, प्रदेश र स्थानीय तहबीच समन्वय गर्दै दीर्घकालीन विकासको मार्गचित्र तयार गरिनेछ । अब मतदाताले यी प्रतिबद्धताहरूलाई कत्तिको विश्वास गर्छन् भन्ने विषय आगामी निर्वाचनले तय गर्नेछ ।