कपिलवस्तु ,माघ २२
कपिलवस्तु जिल्लाको मायादेवी गाउँपालिका–१, पकडीमा “एक शाम राष्ट्रको नाम” भन्ने मूल नारासहित आयोजित इन्डो–नेपाल मुसायरा कवि सम्मेलन आज सफलतापूर्वक सम्पन्न भएको छ ।
आयोजक समितिका सदस्य र रियाज खानका अनुसार, सम्मेलनमा भारत र नेपालका ख्यातिप्राप्त कवि तथा शायरहरूको उल्लेख्य सहभागिता रहेको थियो । कार्यक्रममा उर्दू, हिन्दी र नेपाली भाषामा राष्ट्रप्रेम, सामाजिक सद्भाव, मानवीय भावना र समसामयिक विषयवस्तुमा आधारित कविता तथा शायरी प्रस्तुत गरियो, जसले उपस्थित दर्शकहरूलाई मन्त्रमुग्ध बनाएको आयोजकले जनाएका छन् ।
कवि सम्मेलनमा स्यान शबनम, गुले सबा फतेहपुरी, चाँदनी शबनम लगायतका चर्चित कवि–शायरहरूको उपस्थिति रहेको थियो। सहभागीहरूले बताएका अनुसार उनीहरूले प्रस्तुत गरेका रचनाले राष्ट्रिय एकता, भाइचारा र आपसी समझदारीको सन्देश प्रवाह गरेको थियो ।
दुई देशबीचको ऐतिहासिक, सांस्कृतिक तथा साहित्यिक सम्बन्धलाई अझ प्रगाढ बनाउने उद्देश्यले आयोजना गरिएको यस मुसायराले राष्ट्रिय एकता, आपसी समझदारी र भाइचारा अभिवृद्धि गरेको आयोजकले विश्वास व्यक्त गरेका छन् ।
कार्यक्रमका अवसरमा प्रमुख अतिथि तथा उपस्थित सम्पूर्ण व्यक्तित्वलाई आयोजक समितिको तर्फबाट खादा, माला तथा सम्मानपत्र प्रदान गरिएको क्षेत्रका समाजसेवी अबु सुफियान खानले जानकारी दिए । उनका अनुसार सम्मान कार्यक्रममा सहभागीहरूको सम्मान मात्र नभई कार्यक्रमको गरिमा पनि अझ बढेको थियो ।
स्थानीय बुद्धिजीवी, साहित्यप्रेमी, सामाजिक अगुवा र सर्वसाधारणको उल्लेख्य सहभागिताबीच कार्यक्रम शान्त, सभ्य र भव्य वातावरणमा सम्पन्न भएको आयोजक समितिले जनाएको छ ।
