कपिलवस्तु, फागुन २
आसन्न प्रतिनिधि सभा निर्वाचनलाई लक्षित गर्दै कपिलवस्तु निर्वाचन क्षेत्र नम्बर–१ मा जनमत पार्टी का तर्फबाट उम्मेदवार नरेन्द्र चौधरी यतिबेला सक्रिय रूपमा मतदातामाझ पुग्दै हुनुहुन्छ । घरदैलो, टोलभेला तथा अन्तरक्रिया कार्यक्रममार्फत उहाँले आफ्नो प्रतिबद्धता र घोषणापत्रका मुख्य बुँदा सार्वजनिक गरिरहनुभएको छ ।
उम्मेदवार चौधरीले पुरानो असफल राजनीतिक अभ्यासको अन्त्य गर्दै सत्तामुखी होइन, जनमुखी तथा उत्तरदायी राजनीति आवश्यक रहेको बताउनुभएको छ । आर्थिक विकास, रोजगारी सिर्जना, कृषि आधुनिकीकरण, गुणस्तरीय शिक्षा, सर्वसुलभ स्वास्थ्य सेवा तथा पारदर्शी सुशासनलाई प्राथमिकतामा राख्दै उहाँ मतदातासँग प्रत्यक्ष संवादमा जुट्नुभएको हो ।
दलको एजेन्डाअनुसार आगामी पाँच वर्षभित्र आर्थिक वृद्धि तीव्र बनाउने, गरिबी न्यूनीकरण गर्ने, युवालाई स्वदेशमै रोजगारी उपलब्ध गराउने तथा आत्मनिर्भर अर्थतन्त्र निर्माण गर्ने लक्ष्य लिइएको छ । हरित ऊर्जामा आधारित विकास, सुरक्षित आवास, स्वच्छ खानेपानी र ‘स्मार्ट सिटी–स्मार्ट भिलेज’ अवधारणालाई पनि प्राथमिकतामा राखिएको जनाइएको छ ।
नरेन्द्र चौधरीले महिला, दलित, मधेसी, मुस्लिम, आदिवासी जनजाति तथा सीमान्तकृत समुदायको समान अधिकार र सहभागिता सुनिश्चित गर्ने प्रतिबद्धता व्यक्त गर्नुभएको छ । साथै भ्रष्टाचार नियन्त्रणका लागि शून्य सहनशीलताको नीति अवलम्बन गरिने उहाँको भनाइ छ ।
कपिलवस्तु क्षेत्र–१ मा मतदातासँगको प्रत्यक्ष संवादलाई प्राथमिकता दिँदै अघि बढ्नुभएका चौधरीको सक्रियताले चुनावी माहोल तातिएको स्थानीयहरूले बताएका छन् ।