काठमाडौं, पुष ०८ ।
प्रतिनिधिसभा सदस्य निर्वाचनका क्रममा विभिन्न पाँच जना उम्मेदवारविरुद्ध निर्वाचन आयोगमा उजुरी दर्ता भएको छ । निर्वाचन आयोगका अनुसार प्राप्त उजुरीहरूमाथि हाल अध्ययन भइरहेको छ ।आयोग स्रोतका अनुसार भक्तपुर निर्वाचन क्षेत्र नम्बर २ बाट उम्मेदवार रहेका दुई जनाविरुद्ध उजुरी परेको छ । ती उम्मेदवारहरूमा राष्ट्रिय स्वतन्त्र पार्टी (रास्वपा) का राजीव खत्री र नेपाल जनसेवा पार्टीकी जानुका पाठक रहेका छन् ।यसैगरी पूर्वप्रधानमन्त्री माधवकुमार नेपालको उम्मेदवारीविरुद्ध पनि उजुरी परेको छ। नेपालले रौतहट निर्वाचन क्षेत्र नम्बर १ बाट उम्मेदवारी दिएका छन् ।कैलाली निर्वाचन क्षेत्र नम्बर १ बाट उम्मेदवार रहेका नागरिक उन्मुक्ति पार्टीका रेशम चौधरीविरुद्ध पनि उजुरी परेको आयोगले जनाएको छ । यस्तै सुनसरी निर्वाचन क्षेत्र नम्बर २ बाट उम्मेदवार रहेका राष्ट्रिय स्वतन्त्र पार्टी (रास्वपा) का लालबिक्रम थापाविरुद्ध समेत उजुरी दर्ता भएको छ ।निर्वाचन आयोगका अनुसार उजुरी कुन–कुन विषयमा परेको हो भन्नेबारे हालसम्म कुनै विवरण सार्वजनिक गरिएको छैन । प्राप्त उजुरीमाथि कानुनी प्रक्रिया अनुसार अध्ययन भइरहेको आयोगको भनाइ छ ।
