कपिलवस्तु, पुष ७
फल्गुण २१ गते हुने प्रतिनिधि सभा सदस्य निर्वाचनका लागि कपिलवस्तु निर्वाचन क्षेत्र नम्बर १ बाट जनमत पार्टीको तर्फबाट नरेन्द्र प्रसाद चौधरी लाई उम्मेदवारी दिइएको छन् । पार्टीको केन्द्रीय निर्णयअनुसार उनी सो क्षेत्रबाट उम्मेदवार बनेका हुन् ।
चौधरी हाल जनमत पार्टीका केन्द्रीय उपाध्यक्ष हुन् र लामो समयदेखि राजनीति क्षेत्रमा सक्रिय छन् । उम्मेदवार बनेसँगै क्षेत्र नम्बर १ मा चुनावी माहोल थप तातिएको छ । उनका प्रवेशले यहाँ रोमाञ्चक चुनावी भिडन्त हुने संकेत पनि देखिएको छ ।
चौधरीको साथमा हाल जिल्लाका चर्चित नेता तथा पूर्व मन्त्री दानबहादुर चौधरी पनि प्रचार–प्रसारमा सक्रिय देखिएका छन् । पुर्व मन्त्री चौधरी पनि जनमत पार्टीका वरिष्ठ केन्द्रीय उपाध्यक्ष हुन् । उनी दुबैको संयुक्त उपस्थितिले क्षेत्रभर पार्टीको अभियानलाई थप जोश र गती प्रदान गरेको बताइन्छ ।
क्षेत्रभर अहिले प्रत्येक राजनीतिक दलले मतदातासँग प्रत्यक्ष सम्पर्क गर्ने, घर–दैलो पुग्ने काम सुरु गरिसकेको छ । पार्टीका नेताहरूले संगठन सुदृढीकरण र जनसमस्यालाई प्राथमिकतामा राख्दै चौधरीलाई उम्मेदवार बनाएको बताएका छन् ।
२०७९ सालको प्रतिनिधि सभा निर्वाचनमा चौधरीले सोही क्षेत्रबाट ८ हजार ३९६ मत प्राप्त गर्दै तेस्रो स्थान हासिल गरेका थिए । यसपटक उनी आफ्नो अनुभव र पार्टीको मजबुत संगठनसहित मतदातासँग संवाद गर्दै प्रतिस्पर्धामा उत्रिने योजना बनाएका छन् ।
