कपिलवस्तु -२८
कपिलवस्तु प्रहरीले भन्सार छली गर्दै महँगो मसिनो चामल भित्र्याउन खोज्ने एक समूहलाई पक्राउ गरेको छ । गोप्य सूचनाका आधारमा खटिएको प्रहरी टोलीले बिलमा भएका विवरणभन्दा फरक र बढी मात्रामा चामल बोकेका तीन भारतीय ट्रेलरलाई मायादेवी गाउँपालिका–१, पकडीबाट नियन्त्रणमा लिएको हो ।
प्रहरी नायब उपरीक्षक रिपेन्द्र कुमार सिंहका अनुसार नियमित चेकजाँचका क्रममा ट्रेलरहरूमा उल्लेख गरिएकोभन्दा महँगो र भिन्न किसिमको चामल फेला परेको थियो । नियन्त्रणमा लिइएका ट्रेलरहरूको नम्बर युपी ५१ बीटी ३९३२, एचआर ६९३२ ई ९०३९ र एचआर ५८ बी ८६८७ रहेका छन् ।
प्रहरीका अनुसार युपी ५१ बीटी ३९३२ नम्बरको ट्रेलरमा ४२,२२० केजी ‘डी वाइल्ट केक पोल्ट्री फिड्स’ चामल (मूल्य रु. २६ लाख ४ हजार ८६६), एचआर ६९३२ ई ९०३९ मा ४२,००० केजी बासमती चामल (मूल्य रु. ५३ लाख १८ हजार १०) र एचआर ५८ बी ८६८७ मा ४२,००० केजी ‘सोया डक’ चामल (मूल्य रु. २५ लाख ९१ हजार २९३) फेला परेको छ ।
प्रहरी उपरीक्षक सन्तोष आचार्यका अनुसार व्यापारीहरू लामो समयदेखि मोटो चामलको नाममा कम भन्सार शुल्क तिर्ने तर मूलतः महँगो मसिनो चामल भित्र्याएर राजस्व छली गर्दै आएको सूचनाका आधारमा अभियान सञ्चालन गरिएको हो ।
“मोटो चामलको नाममा मसिनो चामल ल्याएर राजस्व छली भइरहेको सूचनापछि ट्रेलर नियन्त्रणमा लिइएको हो,” आचार्यले बताए ।
बरामद गरिएको चामल र तीनवटै ट्रेलरको संयुक्त मूल्य रु. १ करोड ८० लाख १४ हजार आंकेको प्रहरीले जनाएको छ । नियन्त्रणमा परेका ट्रेलर चालक तथा बरामद वस्तुहरूलाई आवश्यक कारबाहीका लागि राजस्व अनुसन्धान कार्यालय, बुटवल पठाइएको डिएसपी सिंहले जानकारी दिए ।