कपिलवस्तु, मंसिर ५ ।
क्वेस्ट नेपाल लुम्बिनी हबको आयोजनामा विद्यार्थी गुणीय चक्र (SQC) अन्तर्गतको दशौँ सम्मेलन कपिलवस्तुमा हुने भएको छ। सम्मेलन मंसिर ५ र ६ गते शुद्धोधन गाउँपालिका–१, बग्दि स्थित सनलाईट इङ्लिस बोर्डिङ स्कुलमा आयोजना गरिने भएको हो ।
पत्रकार सम्मेलनमार्फत सार्वजनिक गरिएको जानकारी अनुसार सम्मेलनमा कपिलवस्तुका १७ विद्यालयका करिब ७ सय विद्यार्थी सहभागी हुने छन् । साथै, अन्य जिल्लाका ८ विद्यालयका विद्यार्थीहरू पर्यवेक्षकका रूपमा सहभागी हुने जनाइएको छ ।
क्वेस्ट नेपाल लुम्बिनी हबका अध्यक्ष मदन मल्लका अनुसार विद्यार्थी गुणीय चक्र कार्यक्रमले विद्यार्थीहरूमा समस्या पहिचान, विश्लेषण र समाधान क्षमताको विकास गर्ने उद्देश्य राखेको छ । यस सम्मेलनले विद्यार्थीहरूमा नेतृत्व, समूहगत कार्य, रचनात्मक सोच र आत्मविश्वास अभिवृद्धिमा टेवा पुर्याउनेछ ।
कार्यक्रमको उद्घाटन लुम्बिनी प्रदेशका मुख्यमन्त्री चेतनारायण आचार्यको प्रमुख आतिथ्यतामा हुने सम्भावना रहेको आयोजकले जनाएको छ । उद्घाटन समारोहमा प्रदेश सांसद, स्थानीय जनप्रतिनिधि, विद्यालयका प्रमुख, शिक्षक तथा क्वेस्ट नेपालका केन्द्रीय पदाधिकारीहरूको उपस्थिति रहने जानकारी दिइएको छ ।
दुईदिने उक्त सम्मेलनमा विद्यार्थीहरूको सहभागितामा विभिन्न शैक्षिक प्रतियोगिता, उद्घोषण तालिम, क्विज, हिज्जे प्रतियोगिता, एआई सम्बन्धी तालिम र सांस्कृतिक कार्यक्रम सञ्चालन गरिनेछ । लुम्बिनी हबका सचिव डम्बर बहादुर सोमैका अनुसार कार्यक्रमका सम्पूर्ण क्रियाकलाप विद्यार्थीहरूले नै सञ्चालन गर्नेछन्, जसले उनीहरूको जिम्मेवारी र आत्मविश्वास वृद्धि गर्ने अपेक्षा गरिएको छ ।
कार्यक्रमस्थल सनलाईट इङ्लिस बोर्डिङ स्कुलका प्रबन्ध निर्देशक एस.एन. त्रिपाठीले विद्यार्थीहरूलाई सिर्जनशील र प्रतिस्पर्धी बनाउन यस किसिमका कार्यक्रमले महत्वपूर्ण भूमिका खेल्ने बताए । उनका अनुसार यस प्रकारका गतिविधिले विद्यार्थीहरूमा राष्ट्रिय तथा अन्तर्राष्ट्रिय स्तरमा प्रतिस्पर्धा गर्ने क्षमता विकासमा सहयोग पुर्याउँछ ।
विद्यार्थी गुणीय चक्र (SQC) शिक्षण–अभ्यासको एउटा प्रभावकारी विधा हो, जसअन्तर्गत विद्यार्थीहरूले साना समूह बनाएर विद्यालय वा घरपरिवारमा देखिएका समस्या पहिचान गर्छन् र वैज्ञानिक विधिबाट त्यसको समाधानका उपायहरू निकाल्छन् । यस प्रक्रियाले विद्यार्थीहरूमा सहकार्य, विश्लेषण, नेतृत्व र व्यवहारिक सीपको विकास गर्छ ।
कपिलवस्तुमा यस किसिमको वृहत सम्मेलन पहिलो पटक आयोजना हुन लागेको हो । आयोजकहरूका अनुसार यसले जिल्लाको शैक्षिक क्षेत्रमा नयाँ ऊर्जा थप्ने र विद्यार्थीहरूमा वैज्ञानिक सोच र जिम्मेवार नागरिक बन्ने चेतना जगाउने अपेक्षा गरिएको छ ।