कपिलवस्तु, ६ मंसिर –
शुद्धोधन गाउँपालिका–१, बगदीमा हिजोदेखि सुरु भएको विद्यार्थी गुणीय चक्र (एसक्यूसी) शैक्षिक महाकुम्भ भव्य र शैक्षिक वातावरणमा आरम्भ भएको छ । क्वेस्ट नेपालको समन्वय र सन लाइट इङ्लिस बोर्डिङ स्कुलको आयोजनामा प्रारम्भ गरिएको यस महाकुम्भमा जिल्लाका विभिन्न विद्यालयका विद्यार्थी, शिक्षक, शिक्षाप्रेमी तथा अभिभावकहरूको उल्लेखनीय सहभागिता देखिएको छ ।
उद्घाटन समारोहका प्रमुख अतिथि लुम्बिनी प्रदेश सरकारका युवा तथा खेलकुद मन्त्री सन्तोष पाँडेले पानसमा दीप प्रज्वलन गरी महाकुम्भको उद्घाटन गरेका थिए । उद्घाटन सत्रमा मन्त्री पाँडेलाले शिक्षालाई राष्ट्र विकासको मूल आधारका रूपमा व्याख्या गर्दै यस्ता शैक्षिक अभियानले विद्यार्थीको अव्यक्त क्षमता उजागर गर्न उल्लेखनीय योगदान पुर्याउने विश्वास व्यक्त गरे । उनले सामुदायिक तथा निजी क्षेत्रबीचको सहकार्यले शिक्षामा सकारात्मक परिणाम ल्याउने उल्लेख पनि गरे ।
सृजनशीलता, अनुशासन र नेतृत्व विकासमा केन्द्रित महाकुम्भ
आयोजक संस्था सन लाइट इङ्लिस बोर्डिङ स्कुलका प्रबन्ध निर्देशक एस. एन. त्रिपाठीका अनुसार महाकुम्भमा जिल्लाका १७ विद्यालयबाट ७०० भन्दा बढी विद्यार्थी सहभागी भएका छन् । उनका अनुसार विद्यार्थी गुणीय चक्रको उद्देश्य विद्यार्थीलाई केवल पाठ्यपुस्तकमा सीमित नराखी नेतृत्व क्षमता, समस्या समाधान सीप, व्यवहारिक ज्ञान र सकारात्मक सोच विकास गर्न मद्दत पुर्याउनु हो ।
कार्यक्रम स्थलमा विविध शैक्षिक प्रदर्शनी, समूहगत प्रस्तुति, अनुभव आदान–प्रदान, सिर्जनशील लेखन, विषयगत प्रतियोगिता तथा व्यवहारिक गतिविधिहरू निरन्तर सञ्चालन भइरहेका छन् । विद्यार्थीहरूले टोलीगत कार्य, सहकार्य भावना र अनुशासनपालनमा उल्लेखनीय उत्साह देखाएका छन् ।
विद्यार्थीको क्षमता उजागर गर्ने उद्देश्यसहित विविध गतिविधि सञ्चालन
महाकुम्भमा सहभागी विद्यार्थीहरूले गतिविधिले आत्मविश्वास, नेतृत्व क्षमता र समूहगत तालमेल वृद्धि गरेको प्रतिक्रिया दिएका छन् । अभिभावकहरूले बालबालिकाको रुचि, सीप र क्षमता पहिचानमा यस्ता अभियान अत्यन्त उपयोगी हुने बताउँदै कार्यक्रमलाई निरन्तरता दिनुपर्ने धारणा राखेका छन् ।
शिक्षकहरूले विद्यार्थीको सृजनशीलता, विश्लेषण क्षमता र सकारात्मक सोच विकासमा कार्यक्रम प्रभावकारी रहेको उल्लेख गर्दै एसक्यूसी अभियान स्थानीय तहमै शैक्षिक सुधारको प्रेरणादायी उदाहरण बन्न सक्ने विश्वास व्यक्त गरेका छन् ।
सांस्कृतिक प्रस्तुति, प्रतिभा प्रदर्शन, सिप विकास कक्षा तथा अन्तरक्रियात्मक सत्रहरूले कार्यक्रमलाई अझ आकर्षक बनाएका छन् । विद्यार्थीको व्यापक रुचि र क्षमतालाई अभिव्यक्त गर्न पाएको अवसरले महाकुम्भ विशेष प्रभावकारी देखिएको सहभागीहरूको भनाइ छ ।
समापनमा उत्कृष्ट समूह तथा विद्यार्थी सम्मानित हुने
एसक्यूसी अवधारणामा आधारित यो शैक्षिक महाकुम्भ आज बेलुका समापन समारोहमा उत्कृष्ट प्रदर्शन गर्ने समूह, विद्यार्थी तथा सम्बन्धित संयोजकलाई सम्मान तथा पुरस्कार प्रदान गरी समापन हुने आयोजक संस्थाले जनाएको छ ।
शैक्षिक वातावरण, विद्यार्थीको सक्रियता र अभिभावकको उत्साहले महाकुम्भले स्थानीय तहमा शैक्षिक चेतना अभिवृद्धि गर्दै नयाँ ऊर्जा थपेको अनुभूति सहभागीहरूले व्यक्त गरेका छन् ।
