मेघराज राय, जिराभवानी पर्सा ,
असार २४, ठोरी / पर्साको ठोरी गाउँपालिका वडा नं. ५ स्थित बाघमोर्चा माईको मन्दिर परिसरमा वृक्षारोपण कार्य सम्पन्न भएको छ । ठोरी युथ भिजन फाउन्डेसनको सहयोगमा तार जालि सहितको वृक्षारोपण कार्य सम्पन्न भएको हो । ठोरी युथ फाउन्डेसनका संस्थापक सदस्य सुरेश पाख्रीनको पहलमा फाउन्डेसनका सदस्यहरु तथा ठोरी-५ वडाध्यक्ष अष्ट बहादुर लोपचनको प्रमुख आतिथ्यमा चेरी बोलोसन, जेक्रडा, कपुर जापानी लगायत विभिन्न प्रजातीका ५० भन्दा बढी विरुवा रोपिएको संस्थाका उपाध्यक्ष रोशन लोपचनले जानकारी दिए ।
कार्यक्रममा फाउन्डेसनका अध्यक्ष नारायण वाइबा, सुरक्षाकर्मी, फाउन्डेसनका सदस्यहरु, स्थानीय युवाहरूको उपस्थितिमा वृक्षारोपण कार्य सम्पन्न भएको थियो । यस वृक्षारोपण कार्यमा संलग्न सम्पूर्ण युवा तथा सरोकारवालाहरुलाई ठोरी-५ वडाध्यक्ष लोपचनले धन्यवाद व्यक्त गरेका छन् ।