तुलसीपुर,२८-माघ/ दाङको तुलसीपुरस्थित एक जुत्ता चप्पलको गोदाममा लागेको भिषण आगलागीमा परेर मृत्यु भएका पाँचै जनाको सनाखत भएको छ । मृत्यु हुनेमा एकै परिवारका तीन जना र अन्य परिवारका दुई जना रहेका छन् ।गएराती पौने २ बजेदेखि लागेको आगोमा परेर मृत्यु हुनेमा चार जना बालबालिका रहेका छन् भने एक पुरुषको मृत्यु भएको छ । मृत्यु हुनेमा इरम फुटवेयरका संचालक तुलसीपुर उपमहानगरपालिका वडा नं. ५ का अन्दाजी ४०/४२ वर्षीय नजरदिन अली, उनको अन्दाजी १३/१४ वर्षीया छोरी सजिता खातुर र छोरा अन्दाजी ५/६ वर्षका आवीदिन अली रहेको ईलाका प्रहरी कार्यालय तुलसीपुरले जनाएको छ ।त्यसैगरी उक्त आगलागीमा परेर सोही पसलमा काम गर्ने अन्दाजी १४/१५ वर्षीय हसज बकस र १७ वर्षीय मसिन वकस रहेका छन् । उनीहरुको शव जलेको अवस्थामा प्रहरीले शुक्रबार बिहान निकालेको थियो । मृतकहरुको शव अहिले राप्ती प्रादेशिक अस्पतालको शवगृहमा राखिएको छ ।