वसन्त अनुभव
काठमाडौं, ९ जेठ
नेपालमा पुन: २० जनामा कोरोना भाइरसको संक्रमण भएको पुष्टि भएको छ। स्वास्थ्य तथा जनसंख्या मन्त्रालयका प्रवक्ता डा विकास देवकोटाले मन्त्रालयद्वारा हुने नियमित मिडिया व्रिफिङ कार्यक्रममा उक्त जानकारी दिएका हुन ।
थप कोरोना संक्रमण भएको पुष्टि हुनेमा कैलालीका ३ जना, डडेल्धुराका १ जना, बैतडीका १ जना, मोरङका १ जना र बाँकेका १४ जना व्यक्ति रहेका छन ।
संक्रमित हुनेमा कैलालीका १९, २३ र २६ वर्षीय पुरुष रहेका छन जो जानकी गा.पा.को क्वारेन्टाइनमा बस्दै आएका थिए । त्यस्तै डडेल्धुरा जिल्ला पर्शुराम- १ का २८ वर्षीय पुरुषमा कोरोना संक्रमण देखिएको हो ।
त्यस्तै बैतडी शिवनाथ -१ का २२ वार्षिकोत्सब पुरुष कोरोना पोजिटिभ पुष्टि भएका हुन । उपरोक्त सबैको सेती प्रादेशिक अस्पताल, कैलालीको प्रयोगशालामा नमुना परिक्षणको क्रममा पोजिटिभ देखिएको हो ।
त्यस्तै बाँकेको राप्ती सोनारीका १८ वर्षिय पुरुषमा र नरैनापुर गापाका १८ देखि ६१ वर्ष उमेर समुहका १३ जना पुरुषमा कोरोना पुष्टि भएको छ । निजहरुको भेरी प्रादेशिक अस्पताल, नेपालगन्जमा स्वाव नमुना परिक्षणका क्रममा कोरोना पोजिटिभ देखिएको हो ।
त्यस्तै मोरङ जिल्ला रतुवामाई २ का ४१ वर्षीय पुरुषमा पनि कोरोना संक्रमण पुष्टि भएको छ ।
प्राप्त विवरण अनुसार आज मात्र बिहान कोरोना पुष्टि भएका ३० जना र दिउसो पुष्टि भएका २० जना गरी ५० जनामा कोरोना संक्रमणको पुष्टि भएको छ । यसरी थप संक्रमित सहित नेपालमा कोरोना संक्रमितको संख्या ५०७ जना पुगेको छ। जसमा ४३३ जना पुरुष र ७४ जना महिला रहेका छन ।
हाल आइसोलेसनमा रहेका कोरोना संक्रमितहरु ४३४ जना रहेका छन । प्रदेश बमोजिमको विवरण अनुसार प्रदेश नं. १ मा ५८ जना, प्रदेश नं. २ मा १४५ जना, वागमती प्रदेशमा १८ जना, गण्डकी प्रदेशमा ३ जना, प्रदेश नं. ५ मा २०३ जना, कर्णाली प्रदेशमा १ जना र सुदुरपश्चिम प्रदेशमा ५ जना कोरोना संक्रमितहरु उपचाररत रहेका छन ।
प्रदेश अनुसार संक्रमितको विवरण
मन्त्रालयका प्रवक्ता डा देवकोटाका अनुसार नेपालभरका ४० जिल्लामा कोरोना संक्रमित भेटिएका छन। प्रदेश अनुसार कोरोना संक्रमितको विवरण निम्नानुसार रहेको छ । प्रदेश नं. १ मा ८५ जना, प्रदेश नं. २ मा १५१ जना, वागमती प्रदेशमा २८ जना, गण्डकी प्रदेशमा ५ जना, प्रदेश नं. ५ मा २२७ जना, कर्णाली प्रदेशमा १ जना र सुदुरपश्चिम प्रदेशमा १० जना कोरोना संक्रमित रहेका छन ।
कोरोना संक्रमितहरु मध्ये ३ जनाको मृत्यु भएको पुष्टि भएको छ । मृत्यु हुनेमा २ जना पुरुष र १ महिला रहेका छन ।
मन्त्रालयका प्रवक्ताका अनुसार आज उपचार पछि निको भइ डिस्चार्ज हुने कोरोना संक्रमितको संख्या २१ रहेको छ । प्रखर सुशील कोइराला मेमोरियल क्यान्सर अस्पतालमा रहेको कोरोना अस्पतालमा उपचाररत १२ जना पुरुष र ९ जना महिला डिस्चार्ज भएका हुन । १ देखि ६० वर्ष उमेरका ती ब्यक्तिहरु १७ देखि २० दिनको उपचार बसाई पश्चात् पिसिआर नेगेटिभ आएपछि डिस्चार्ज गरिएको हो यो सँगै डिस्चार्ज हुनेको संख्या ७० पुगेको छ ।
प्राप्त विवरण अनुसार प्रदेश नं. १ बाट २६ जना, प्रदेश नं. २ बाट ६ जना, वागमती प्रदेशबाट ९ जना, गण्डकी प्रदेशबाट २ जना, प्रदेश नं. ५ बाट २२ जना, र सुदुरपश्चिम प्रदेशबाट ५ जना डिस्चार्ज भएका छन ।
मन्त्रालयका प्रवक्ता डा देवकोटाका अनुसार हालसम्म ४२ हजार ५ सय १७ जनाको पिसिआर प्रविधिबाट र ८२ हजार १ सय १६ जनाको आरडिटि प्रविधिबाट कोरोना परिक्षण गरिएको छ । वितेको २४ घन्टामा मात्र ३ हजार ८ सय १९ जनाको पिसिआर प्रविधिबाट परीक्षण भएको छ भने ३ हजार ४ सय २१ जनाको आरडिटि प्रविधिबाट परीक्षण भएको छ ।
देशभर हाल २७ हजार ८ सय २९ जना क्वारेन्टाइनमा बसेका छन । जसमा प्रदेश नं. १ मा १ हजार ४ सय १४ जना, प्रदेश नं. २ मा ५ हजार ९ सय ६ जना, वागमती प्रदेशमा ४ सय ७८ जना, गण्डकी प्रदेशमा ६ सय ७८ जना, प्रदेश नं. ५ मा १५ हजार ९ सय ८९ जना, कर्णाली प्रदेशमा ७ सय ३५ जना र सुदुरपश्चिम प्रदेशमा २ हजार ६ सय २९ जना क्वारेन्टाइन बसेका छन ।
