बिरगंज :- मंसिर ४ को निर्वाचनका लागि पर्सामा कर्मचारी, स्वयंसेवक र म्यादी प्रहरी सहित ११ हजारभन्दा बढी जनशक्ति खटिने भएका छन् ।
जिल्ला प्रशासन कार्यालय पर्साका प्रवक्ता एंव सहायक प्रमुख जिल्ला अधिकारी भीमकान्त पौडेलका अनुसार मंसिर ४ को निर्वाचनका लागि पर्सा जिल्लामा १ सय ६७ स्थायी र २ अस्थायी गरी कुल १ सय ६९ मतदान स्थल तोकिएका छन् ।यस्तै ४ सय १५ स्थायी र २ अस्थायी गरी ४ सय १७ मतदान केन्द्र रहेका छन् ।
जिल्ला भरिका मतदान स्थल र मतदान केन्द्रमा गरि ४ हजार ६ सय सुरक्षाकर्मी, २ हजार म्यादी प्रहरी, ४ हजार ५ सय स्वयंसेवक र कर्मचारी खटिनेछन् । जिल्लामा साधारण, संवेदनशील र अति संवेदनशील गरी ३ श्रेणीमा मतदानस्थललाई छुट्याइएको छ ।
सुरक्षा संवेदनशीलताका कारणले संवेदनशील र अति संवेदनशील मतदानस्थलको नाम भने सार्वजनिक गरिएको छैन । निर्वाचन कार्यालयका अनुसार पर्सामा जिल्लामा ३ लाख ४५ हजार मतदाता छन् ।