उमेश कुशवाहा, वीरगञ्ज (पर्सा)
चार दिनदेखिको अविरल वर्षा र हावाहुरीले मधेश प्रदेशका अधिकांश जिल्लामा ठुलो असर पारेको छ। किसानले खेतमा लगाएका धानबाली र तरकारीमा व्यापक क्षति पुगेको छ।
पाकिसकेको धान थन्क्याउन नपाउँदै खेतमै भासिएपछि किसानहरू निराश बनेका छन्। हावाहुरीसहितको लगातार वर्षाले खेतमा ढलेको धान सड्न थालेको र तरकारी बाली पनि नष्ट भएको किसानहरूको गुनासो छ।
पर्साका किसान शिवचन्द्र महतो भाबुक हुँदै भन्छन् — “एक पटक लगाएको धानले बर्षभरि खान पुग्थ्यो, तर यो अविरल वर्षा र हावाहुरीले खेतमै धान सोत्तर भयो। अब हाम्रो मेहनत र आशा दुवै माटोमा मिल्यो।”
कृषि प्राविधिकहरूका अनुसार वर्षा र हावाहुरीका कारण खेतमा पानी जम्दा धानको गोडा कुहिने र उत्पादनमा ह्रास हुने अनुमान गरिएको छ।
स्थानीय प्रशासन र कृषि ज्ञान केन्द्र वीरगञ्जले क्षतिको विवरण संकलन थालिएको कृषि ज्ञान केन्द्र वीरगञ्जका अधिकृत रामजीवन ठाकुरले बताए।